Sept 2005

PENEMU AKU BULAN SEPTEMBER

Sekali agi kitai betemu baru ba dunya siber, ngajih ka kitai senang lantang dalam semua pengawa awak ka tau mai penyenang ka jemah ila serta Selamat Hari Merdeka. Merdeka, Merdeka, Merdeka !!!……

Tu bulan ke Sembilan ba Calender tang bulan ke Empat ba kitai Dayak. Maioh batang pengawa udah belabuh serta udah mujur di gaga kenyau kitai ngelengka ka taun ti lama. Pengawa bumai betupi udah mujur di atur nitih ka ripih pengawa betaun. Belabuh ari ujung bulan Lapan nyentuk ka tengan bulan Sembilan tu, menua kitai di Sarawak di sadang besebun laban pengawa ti betunu ka umai. Enti kitai mindah ari Lundu ke Miri kandang ka seminggu tu, dia kitai bisi meda maioh dandang umai udah kemas di tunu, sekeda nganti pengawa ti nugal tauka betambak.

Ba pengawa sekula, bulan tu mega bulan alai bala nembiak kitai nyedia ka diri duduk peresa ba tahun ke Enam, peringkat UPSR. Bala ti ba Tingkatan Tiga, Lima enggau Enam, sida tentu udah besedia duduk peresa PMR, SPM serta STPM ba bulan dudi tu ila. Ba kenang aku bulan nyin kemari, bulan tu meh nyadi ka adan bala nembiak ti besekula nyedia ka diri nganti maia ke datai peresa ujung tahun. Sida ti Tahun Enam udah mega nganti pemutus peresa. Pemutus ti manah tentu meri peluang sida terpilih ngagai sekula ti manah ba Tingkatan Satu taun dudi nyin ila.

Dalam kitai berandau ngenang pengawa sekula, arap bala tudah di menua pesisir, mega ingat-ingat nyedia ka perengka serta belanja di kena anak sida nurun sekula ba taun dudi nyin ila. Enti sida besedia ari diatu, tentu sekali pengawa nyadi lempung datai ba bulan Satu ila. Tu meh peluang sida nyedia ka diri, laban baju, tanchut serta bek sekula tentu rega udah niki, enti enda salah dinga, getah benung tinggi rega ari selama.

Au, nguing kitai ngagai berita bukai ti nyadi, din dia. Kati ingat kitai utai ti nyadi kena 27 Julai 2005, Helikopter labuh naban ka nyawa sida Niang Lans Koperal Empeni Ak Karong ba Bukit Tibang, Kapit. Lalu ujung bulan Lapan bilun Boeing di Indonesia labuh naban ka lebih 150 nyawa. Lalu bedau pan ambis berandau ka nya berita helilogging pecah serta naban ka 3 nyawa rakyat Russia. Pekara nya mega nyadi di menua pelilih Kapit dalam tempoh kurang ari dua bulan.

Lalu pekara bukai ti tau di pansa kitai ngelansa, baka sambut Hari pengada menua Malaysia. Ninting taun kitai nyambut Hari Pengada menua Malaysia, tang siti pekara ti besai amat enda berapa betul, tau lalu di kingat ka bala nembiak rebak baru. Pekara nya nyadi setegal Sabah serta Sarawak numbuh ka Malaysia begulai enggau Malaya seduai Singapura ti dulu Merdeka kena 31 Ogos 1957. Ba senentang tu, berita ba Surat Kabar, ngayan ka Datuk Seri Joseph Pairin Katinggan madah ka Malaysia Merdeka kena taun 1963, baru 42 taun, endang ia amat patut di kerunding ka kitai di Sabah enggau Sarawak. Bala maioh mega setuju ka pekara nya, lalu nadai kebuah mega kitai di Sabah tauka Sarawak nitih ka angka 48. Nadai salah ba segi undang-undang kitai ngerami Hari Pengada Malaysia setiap taun, enti angka di kurang ka 6 ari angka di guna di Semenanjung. Ba senentang tu, ukai reti, kitai enda “sehaluan” tang endang ia patut di ubah di tambah nitih ka pekara ti amat-amat nyadi. Kitai mesti ingat pekara ti amat-amat nyadi enda ulih kitai ngelakun ka diri, laban seluruh dunya lebih agi Indonesia, Brunei, Philiphine, Thailand serta Singapura nemu Malaysia di tumbuh dalam taun 1963. Ba Kitai Iban, mina siko Tuai, Ayaq Andrew Jika ari Sri Aman, ngayan ka diri ba Surat Kabar, nerang ka pasal Penumbuh Malaysia. Terima kasih ka nuan Ayaq Andrew Jika, laban nuan ulih mansut ka diri, nunjuk ngagai orang bukai, bala kitai Iban mega bisi enggau baum ngepun ka Malaysia. Ba senentang tu, enti nuan enda mansut ka diri enggau surat “bukti” nadai siko orang nemu nuan mega bisi “peranan” ngepun ka Malaysia, nuan mega nadai di temu, siko ari Tuai Iban ngiring bala Iban maia nya kelia. Sinu amat aku ngenang bala Tuai kitai Iban, semimit pan nadai kena pansa leka kenang Numbuh ka Malaysia sekali ka ba surat berita, Radio serta TV, tang apa kan daya, sapa diri tua, dini salah kitai, nama pengelemi kitai? Nama runding bala kitai, orang tau enda ingat ka nama Temenggong Jugah, Stephen Kalong Ningkan, Tawi Sli, Thomas Kana, Datuk Seri Tra Zehndra, Datuk Amar Dunstan Endawi, Penghulu Abok serta maioh nama ke bukai? Ba ngetan ka menua ari kena langgar munsuh, orang mega enda ingat ka nama Kanang Ak Langkau, Awang Ak Rawing, Penghulu Imban, Mathew Ak Medan serta maioh sida bukai ti agi idup serta diau di nengeri serta sekeda diau entigis menua Sarawak. Sinu mega ninga berita Ayaq TR. Nyayang ti diau di Ulu Ensiring Julau, pendiau ia jauh ari nengeri. Pengidup ia mega baka pengidup orang ti ukai kala “berjasa kepada negara”. Amat meh cherita “Forgotten Hero”. Ayaq TR Nyayang siko ari Boarder Scout ti kala betempuh ngelaban Komunis. Orang ti ngepun ka pengawa “komunis” di Sarawak, nyakal Malaysia, tentu ukai Ubong Ak Nuing, tang nama kebuah bala sida Ayaq Nyayang, sida Kanang Ak Langkau di teju ngidup ka diri baka nya.

Limpang ari Cherita lama, ngelansa kitai bekenang ka pekara ti deka nyadi dalam tempoh 5 taun tauka 20 taun ti ka datai nyin ila. Kati kitai udah ngatur serta besedia nangkup serta ngadu ka pengawa nitih ka orang bukai? Aram kitai berati ka tinjau ti jauh. Perintah bisi tinjau nyadi menua maju ba taun 2020. Selangor udah mega nyadi menua / state ti maju taun 2005, dulu 15 taun ari menua Malaysia. Semua opis perintah diatu udah tembu ngatur pemansang Malaysia Lumpar ke 9. Enti nitih maioh mega pemansang bukai deka di atur, arap ka bala kitai mega bisi peluang enggau bebagi ka pemansang nya meh. Bulan Sembilan tu, siti Aum Besai (Seminar & Workshop) di atur opis Menteri Kerajaan Tempatan dan Perumahan Malaysia. Aum tu di kena mutar ka penyaranta/penyuntuk sekeda mensia ti diau di nengeri. Terima kasih ka opis ti ngatur nya laban ulih mai bala NGO baka SDNU. Ari semua pansik ti di bantai ba Aum nya, amat terang meh pun penyeranta, datai ari siko siko mensia ti kurang pelajar sekula. Ari ti kurang pelajar sekula, ia lalu ngepun ka siko-siko mensia nya kurang bepikir, kurang pemintar, kurang penemu serta kurang tinjau. Ba penemu aku, pekara tu ukai mina nyadi ba orang ti diau ba nengeri aja, tang ia mega nyadi ba bala kitai ti diau di rumah panjai menua pesisir. Ari pengurang kitai ba pelajar, penyakit tu mega deka terus betampung ba tubuh bala anak kitai, nya meh lalu ngujung ka bala anak nyadi amaq nengeri, ngereja pengawa ti enda menyana – lepak, mabok tisi jalai, lumba haram, enchuri, peras ugut serta maioh pengawa bukai ti salah ba mata mensia. Kebuah pekara tu nyadi, laban bepun ari kitai ti apai indai kurang pelajar sekula, lalu enda berat berunding ka pemansang anak dudi hari ila. Mulai ngagai Aum nya tadi, dia Opis nya lalu ngumpul penemu ari Jurai (Resolutions) ti tau ngangkat ka pengidup orang ti seranta ngena jalai meri peluang sida ngasai tauka ngangkat ka diri ba Education, Economy, Housing, Social, Health serta Infrastructure ti bisi di sedia ka opis-opis perintah. Manah amat penemu nya, arap ka ia di kena mega ngangkat ka pengidup bala tudah ti diau di menua pesisir meh. Lalu baka bala kaban belayan kitai ti diau ba nengeri ti enda entap pendiau serta enda entap pengawa tau berunding ngerebut peluang nya, ngicha ka bala anak kitai jemah ila tau berubah nasib. Taja pan pengawa enda tetap makai gaji bekuli selalu mindah kin kia, tang perintah udah nyedia ka rumah rega ti patut serta ulih beli bala kaban belayan kitai ti bekuli. Ari ke bebai ka bala bini anak diau enda meruan sebelah Lus (Lodge at construction sites), tentu manah agi “korban” ka anak gaji mayar rumah dalam RM250.00–RM300.00 sebulan. Kebuah pia, awak ka anak kitai meruan / menyana alai tudah belajar.

Emmm, kati ingat bala kitai gentaran jako bulan dulu nyin kemari? “Ba ni pun pengelemi bala kitai sebuat? Kati pengelemi nya tau nyadi ka pengering kitai enti ia di putar ngena penyampat. Nama pengelemi kitai deh? – ba Education, Unity, Religion, Integrity, Knowledge, Culture, Commitment or Charismatic Leaders”

Genteran ke dua, “Aram meh betesau bepadah ka bala bukai, lebih agi ka bala di menua pesisir. Nadai hari orang bukai nulung bansa kitai enti kitai empu enda nulung bansa diri”

Bah bala menyadiq, kati ulih kitai besaup mutar ka semua penanggul enggau penusah bansa kitai ngena jalai begempung? Ba ni kitai begempung …..Parti Politik? Ugama? Diri empu meh ninjau!!!!!

Jangka aku, bedau bisi jalai bukai setakat ke diatu, mina SDNU di pelaba ka ulih alai kitai begulai ngemansang ka bansa. Ba SDNU kitai mesti ngelengka ka penemu politik laban ti enda sebaka parti, pia mega kitai patut ngena SDNU belajar ka genteran leka jako BERSATU TEGUH BERCERAI ROBOH, HORMAT SAMA PEMIMPIN, SA’ATI di tambah ka SEGULAI SEJALAI sekeda leka jako kena kitai nuju semengat begulai ngereja pengawa, ngiga serta nambah ka pemansang ka bansa Dayak.

Selamat Hari Merdeka, mega Selamat mujur dalam semua pengawa.

Terima kasih.