Pengingat Lama: 10/01/2007

Pengingat diri diau di menua pesisir. Begulai enggau apai indai bala ibu bala aya orang ti idup ngiga pemakai ngena chara bumai betupi. Bala menyadi sereta bala petunggal naka ga pengerindu begulai mandi lemai, begulai makai serumpu, begulai maya manggul umai sereta begulai belabuh nugar umai.

Diau di rumah panjai maya nya kelia, ngasai ka pengidup nadai pengirau nadai berunding ka penusah, penyeranta sereta nadai berunding ka pendiau pengidup ka jemah ila. Kebuah pia nyangka laban ngasai ka semua pemakai mudah ngulih, di kebun bisi bulu babas paku tubu, dalam ai sungai bisi ikan tengadak ikan semah enti nasib manah bisi ga empurau, di temuda babas bisi jelu rusa pelanduk munsang abis jai pan jelu kera tau magang di empa. Semua nya tau nyadi ka lauk.

Diatu, asai ke enda tepansut ka leka jaku lebuh maya ngingat ka sekeda pekara ke lama, ukai nama laban sekeda bala dia lebih agi menyadi diri Niang Sintan udah lesi nengali hari udah pulai ke menua amai lebuh umur tudah baru manggai berangkat bujang, nadai sempat tudah belajar ngena HP dalam taun 1993 nyin suba. Jauh sekali ke bebacha ka blog bekunsi ka berita maya kelia.

Nyadi ba tu meh aku naka ulih ngayan ka gambar tudah, awak ka bisi di peda bala anak menyadi anak petunggal iya ti jauh enggau ke semak ti enda sempat ninga jaku ninga tundi ninga uti iya, tang semina selalu ninga kami bekenang ka iya. Arap ka Allah Taala berkat semengat iya belama, laban iya menyadi diri ti bisi "special" ba semua pengawa ari bala bukai.

Intan Bugang (Apai Gerinang) & Cecilia Jantan (Indai Gerinang) di apit Ursla Empana (Indai Nancy), Margaret Jara (Indai Falicka), Pengajar Vincent Demang (Apai Tren), Rabing Ak Saoh (Apai Charles) Ari Mua (L - R) Maria, Sinja Ak Bugang, Bidah Ak Jantan (Indai Pili/Filicia) , Singgal Ak Jantan (Indai Alice) serta Acha Ak Jamban (Indai Atan) (1971)