Nov 2005

PENEMU AKU BULAN NOVEMBER

Sekali agi meri tabi basa serta selamat kitai betemu baru ba bulan tu. Arap ka berita ari bala maioh manah magang lebih agi nyau semak ujung tahun. Ba ujung bulan Oktober tu tadi aku bisi nemuai ngagai bala ti bekerja ba sebelah kilang laban deka nyadung penemu mai begulai dalam SDNU. Maia ti nemuai nya tudah betanya serta bekenang ka bala ti gawa perintah bisi untung laban ulih shopping musim Hari Raya udah bekau ti nerima bonus. Baka sida ti gawa ba kilang serta bekuli ngapa mina nganti gaji, pia ko sida.

Nyadi bala menyadi, sinu amai ga ninga sida besebut ka utai ti munyi nya. Ba penemu aku, tudah benung ngitung hari nganti terima gaji kena shopping, tang nadai sekali-kali meh sida ingat ka pengawa ti deka nyadi ba pun bulan January ila, anak beguna ka perengka kena nurun sekula. Arap ka enda maioh sida ti empu penemu ti baka nya, laban ngasai ka anak ti deka nurun sekula lebih di kemerat ka ari sengapa utai di beli.

Ba pekara nya, teringat mega aku ka siti berita ti pansut ba Borneo Post, Yang Berhormat Datuk Joseph Salang mantai ka penanggul anak ti deka belajar ba rumah panjai, apai indai enda nyedia ka meja belajar tang lebih berat deka bebeli ka perengka bukai baka jemari, kerusi settee, radio Hifi serta TV ti besai. Penemu ti baka tu sigi amat nyadi, sekali ka di rumah panjai tauka ba sekeda bala kitai ti bekuli diau di nengeri. Besaup meh kitai mutar ka penemu ti enda betul nya, lebuh maia ti bisi nemuai pulai ke rumah panjai, laban sinu ka nasib anak, uchu ichit sida/bansa kitai ke jemah ila. Padah padah meh ngagai bala kaban belayan kitai di rumah panjai, besaup mega ngerembai ka berita tauka penemu ti manah ngagai sida. Anang jampat putus asa mega enti sekeda penemu tua enda lalu ulih terima bala kaban belayan tekala nya..

Pekara kedua ti deka aku kunsi enggau bala maioh, ngenang Hak Pengguna. Jangka aku enda semua kitai sedar ka Hak diri empu ba semua utai ti di kena serta utai ti di beli. Di menua ti udah maju, semua mensia nemu Hak diri empu. Nyadi ba menua kitai pekara tu apin berapa di kemerat laban kitai nadai nyenggala deka kiruh.

Ba senentang tu, arap ka bala kitai sama mega belalau ka pangan diri, lebih agi bebeli ka utai ti besai-besai serta rega ti manggai beribu ringgit, laban maioh chara orang ti bejual deka ngiga untung lebih ari ti patut.

Ambi ka banding kitai meli pemakai / ubat ti udah lepas timpuh, kitai bisi Hak nukar ngagai ti baru. Lalu pia mega enti meli utai ke besai baka rumah, kitai bisi Hak mega meda SPECIFICATION ba approved Building Plan. Jangka aku nadai kitai sedar Approved Building Plan ti bisi di limpir ka ba Sale & Purchase Agreement mina saiz kertas A4 ti enda ulih bacha. Saiz nya di gaga mit, tentu bisi niat enda manah, awak ka kitai enda nemu nama specification rumah nya. Nya alai kitai ti meli rumah bisi Hak minta kopi Approved Building Plan ti saiz asal ti bisi di Chop serta kopi surat ari Local Council.

Enti bisi pekara ti enda betul, enda nitih ka Agreement serta enda nitih ka spec, dia kitai jampat ngaga ripot ngagai Tribunal, ba Pejabat Kementerian Perdagangan Dalam Negeri, Tingkat 8, Bangunan Sultan Iskandar, Simpang Tiga, Kuching. Tribunal di beri kuasa penuh nyaga Hak kitai/pengguna. Tribunal meri pemutus penyampau pampas ti patut di bayar ngagai kitai dalam tempuh 60 hari. Jangka aku kitai nadai sedar Hak diri dalam Sale & Purchase Agreement, kitai patut di bayar enti rumah nya enda tembu/siap dalam siti timpuh (24 bulan).

Pekara ti penudi, bai aku perati ka, bala kitai ti ngejang ka menua Sarawak. Di KL aja bala kitai Iban ti bekerja kuli (kilang, construction, Shopping Complex) enda kurang ari 5,000 – 7,000 iko. Ba endur bukai, baka di JB, Ipoh, Penang, Labuan, penyampau nadai mega kitai nemu. Nyadi pekara ti deka bai aku kunsi, di perunding ka kitai maioh, ngiga chara kitai ulih mai sida tu mantai ka identity Iban ti manah ba menua orang serta pekara ti pemadu berat mai sida tu ngambi Hak sida nyadi rakyat Malaysia ti Berdaftar ba SPR serta Hak sida ngenatai ka undi lebuh maia bepilih besai.

Ba penemu aku, enti penusah tu lalu di teju, semakin rugi meh bala kitai ke jemah ila laban orang bukai lalu terus ngena peluang bepilih besai ngiga pengari mutar ka menua ti tau nguntung ka bansa diri empu. Nama pengujung kitai? Mau tidak mau betullah cerita Red Indian di Amerika ti di kumbai orang Dayak, udah nya kitai Dayak di kumbai orang Red Indian of Sarawak. Nya alai awak ka pekara nya enda nyadi, nitih chara orang meh kita ti ba parti-parti politik mantu sida nya tadi Berdaftar ba SPR. Titih meh pengawa ti manah bala Parti SUPP mantu SPR.

Terima kasih