Oct 2005

PENEMU AKU BULAN OKTOBER

Selamat kitai betemu baru ka bulan tu. Nama berita bala kaban menyadi ka lebih agi bala kitai ti bisi anak baru ka ngambi peresa UPSR, PMR, SPM serta STPM? Enda berasai, bulan Sepuluh udah ga datai. Mina dua bulan nyau ka datai ba taun baru 2006. Masa berasai cemburu, nya meh gaya jam jampat belalu enti kitai semampai kiruh ngadu ka pengawa. Nya mega siti ari kebuah bansa Melayu semampai belalau ka leka jako masa itu emas. Jangka aku, bala kitai mega setuju, “pengawa ti beila-ila” ngujung ka maioh pengawa nya empu tau puntan. Bala kitai di nengeri kira ok mega, tang bala di rumah panjai selalu amat beberap patung duduk rerungguk, ngitung hari ngitung jam. Entahlah, nama utai ti di anti nadai mega kitai nemu.

Bala kaban menyadi, sekali tu aku mai bala kitai maioh berunding ngiga jalai baka ni kitai ulih ngepun ka nangkup pengawa ke besai. Utai ti ko aku, “begempung besaup meli reta(assets)”. Kebuah aku mai penemu tu laban langgur SDNU ngaga Rumah Dayak ba Jalai Satok udah semak semak ka teputar. Nitih ka berita ti baru amat di temu ari opis Land & Survey Dept, Site Plan Rumah Dayak baru udah approved by State Planning Authority. Terima kasih ka niang Mohd Arif bin Mahmud laban ti udah kiruh enggau ngadu ka projek Rumah Dayak.

Bah, sekali tu nadai maioh pekara ti bai aku kenang bala kitai sebuat awak kitai bela berunding panjai ka pekara tu.

Ba runding aku, kitai patut naka ulih ngetan ka share bansa Dayak ba Rumah Dayak nya ila. Kandang ka diatu, SDNU mina ngembuan 2 lot (4 ringkat kedai) serta tingkat 4 ba kedai ke 3 ari 7 lot kedai 4 tingkat, lalu 2 ringkat (tingkat 1 & 2) ari 12 tingkat rumah pejabat (main building). Nya alai asai sepi aku patut mega kitai besaup ngambi ungkup ba Rumah Dayak. Bala ti ulih /mampu, tau mega berunding bebeli ka space (ruang pejabat) nyadi ka investment jemah ila.

Nyadi bala kitai ti enda mampu, ngati ka diri nadai jalai, tang ba runding aku kitai ngena jalai begulai ngepun ka Koperasi tauka Company. Buka share ngagai bala Dayak, ambi ka banding, RM1,000 siti share, tentu nadai pemerat, kitai bela ngambi mimit. Bala ti asai ulih ngambi maioh patut nadai di tatak / limit.

Uji kitai berati; Enti kitai ulih ngumpul bala 100 iko, average share RM5,000.00 udah tentu kitai ulih meli tunai (cash).dua ringkat lot kedai.

Senentang tu, sapa bala kitai sanggup ngepun ka pengawa deh? Belalau ka peneleba/pengalaman maia lampau, bala kitai agi seruran ingat ka pengawa diri sama diri enda ulih di karap pama datai ba pengawa kunsi ka duit. Nyadi pengawa bala ti enda lurus nya suba tau nyadi ka penanggul kitai ti deka begulai ngepun ka pengawa kunsi maia diatu.

Bah, enti kitai majak ngingat ka penanggul lama nadai mega jalai kitai tu ulih begulai ngatur pengawa. Ba dunya diatu, pengawa ti nipu pangan diri enda ulih seliah, tang kitai mega ingat, orang ti nipu pan enda ulih ngelari ka diri ari undang-undang. Nya alai pengawa ti bekunsi sigi di panggai kitai ba undang-undang. Koperasi tauka Company di tumbuh belalau ka atur akta Koperasi tauka Company, awak ka ngelindung kitai ti bisi empu share. Nama runding bala kitai maioh, entu setuju, bepadah meh ngagai pangan diri. Giga siko nyadi ka pun pengawa kitai.

Terima kasih.