Jun 2005

PENEMU AKU BULAN JUNE

Selamat Gawai Dayak ka semua. Taun tu kitai nyambut Gawai Dayak ti ke 40 kali. Arap ka semua kitai mujur ngereja pengawa ba maia ti ka datai sepengudah kitai ngintu Gawai sekali ka di nengeri, rumah panjai tauka di menua orang.

Bala kitai ti pulai ke rumah panjai, tentu rindu begulai enggau diri sebilik serta diri serumah.tang bala ti jauh di menua orang nadai ko enggau mega. Kita di menua orang, patut ngintu Gawai ngena atur di menua orang, sekurang-kurang mandang ka diri bisi HARI di intu. Enti taun tu kita enda ulih pulai ke menua, belabuh ari diatu ga kita tau plan ka diri pulai Gawai taun dudi nyin ila, ni nemu taun tu enda ampit penduduk bilun, bala anak mekang peresa, tauka baru mendaftar ba Universiti, enggai nyadi ninggal ka miting. Semua tu pekara ke berat, nadai jako mega.

Mulai ka pengingat, ba penemu aku 40 kali Gawai udah di intu bansa Dayak serata menua Sarawak. Enti enda salah ingat aku, penemu Gawai tu di bantai ba Council Negeri dalam taun 1963 tang enda berapa di kemerat. Penemu nya tebantai baru dalam taun 1964 lalu di gazetted Perintah Sarawak kena bulan Sept. 1964, lalu ngujung ka Gawai Dayak terubah di intu kena 1 June 1965. Terima kasih ka Petara, laban ti meri penemu ngagai Tuai-Tuai kami ari SDNU/SIDS Ybhg. Datuk Tra Zehndra, Indu ti terubah nyadi kaban Council Negeri Menua Sarawak ti minta Gawai Dayak di”recognized”. Sebedau nya suba, kitai ninga bala Dayak ari Lundu nyentuk ka Limbang bisi ngintu Gawai ari bulan satu ngagai bulan Dua Belas laban nitih ka penyamai serta pengelantang diri sebilik serta diri serumah. Nasib kitai bisi Tuai tepeda ka penanggul nya ulih putar dalam taun 1963 suba., enti enda, puas kitai ngabang setaun-taun. Nadai jalai kitai ulih berunding ka pemansang dunya anak sekula, dagang, IT, meli rumah, meli kereta ambis kurang sebuah kereta umur 7 ka 8 taun.

Nyadi diatu, pekara ti tau perunding ka bala kitai maioh dalam SDNU, ni chara kitai ngintu Gawai ba peringkat Bahagian enda serentak ba taun dudi tu ila. Nama runding kita? Ba penemu aku pekara tu ulih di putar ngena aum semua Tuai-Tuai Pampang SDNU/SIDS. Maioh pekara ke bekaul mega tau teputar enggau mujur – baka TUAI Pengabang Menteri Bansa Dayak, enda di perebut tauka digilir nyadi Tuai Pengabang ba siti-siti Bahagian, adat miring anang di CEMAR bansa bukai, bela ngelalau pangan diri ngelimat bebelanja maia Gawai. .

Emmmm…Berasai lantang ninga berita Gawai ari bala kaban ti datai ari Limbang, Miri, Bintulu, Sibu, Kapit, Sarikei, Sri Aman serta Lundu. Ba taun tu bala Pampang SDNU udah di pinta besaup bejalai ka pengawa nagang rega barang serta tambang di tiki enda beradat. Berita ari Sibu, manuk pencen baka rega selama, kira OK mega. Manuk pencen, sama asai manuk tupi lepas di rumah panjai, chukup exercise ni enda.

Nya meh, berita rega barang serta tambang maia Gawai ukai pekara baru. Bisi kaban sekeda ngumbai pekara tu “pekara basi”, udah puas di kerandau tang nadai berubah. Ba penemu aku taja pan pekara tu selalu di kerandau sida ke dulu-dulu ( “Tuai”) tang sida nadai bejalai ka pengawa nagang barang niki. Ba senentang tu aku meri puji serta terima kasih ka sukung bala kaban EXCO SDNU Sibu laban Pampang SDNU ti terubah mai pekara tu ngagai “pihak berkuasa” dalam taun 2000 suba ngena radio serta surat Berita. Nama berita SDNU Sibu? Salam hormat serta lelengau ari kami sebilik. Enda lebu kitai bejurai ka penanggul rega barang tu suba !!!!. Tahniah ngagai semua Kaban SDNU Sibu.

Nyadi, pekara bukai ila ga kitai berandau baru. Pesan aku ngagai semua bala kitai, aku arap ka kitai sama begulai ba SDNU. Maioh penanggul ulih teputar ngena SDNU/SIDS, siti ari NGO ka bansa Dayak ti bisi juluk ati deka ngemansang ka bansa Dayak. Bala rebak baru, di karap nyadi penganti bala “Tuai” kediatu, nya alai kitai nyedia ka diri nyadi “Tuai” ngena SDNU, nyangka nadai peluang ba Lion Club, Toastmaster Club, Scout, St John Ambulance tauka ni ni gerempong NGO.

Terima kasih.