Ogos 2005

PENEMU AKU BULAN OGOS

Selamat kitai betemu baru ba dunya siber, serta arap ka kitai senang lantang dalam semua pengawa. Bulan nyin kemari kitai bisi berandau ka Gawai tang sekali tu udah ga senyap seluruh pelusuk tanah ai.

Ba Bulan Lapan, enti di rumah panjai, tu meh maia sida ngitung hari ke manah laban deka nunu reban tau ka perimba alai bumai. Udah nya ngira ka diri deka betanam ka ensabi, jagung, ubi (empasa), entekai enggau genuk sebedau nugal betanam ka padi. Tu mega maia seluruh menoa Sarawak deka di tuntung asap tebal enti di serumba ka enggau pengawa betunu ari menoa Kalimantan di Indonesia. Penanggul ti baka tu enda ulih di seliah ka semua bala kitai dalam bulan Lapan ninting taun laban tu endang ia udah turan (peraturan/edar) pengawa bumai betupi ba Pulau Borneo kenyau ari kelia menya.

Nyadi bala ti di nengeri, orang di Kuching nyedia ka diri nyambut Hari Kuching nyadi Bandaraya serta di tampung nyambut Hari Malaysia Merdeka. Ba endor bukai baka di Sibu, Miri enggau Bintulu bela bisi pengawa besai di atur nyambut Hari Merdeka. Bala maioh, mega udah penuh semengat gaga ka Merdeka, ba atas jalai maioh kereta, motosikal udah ngantung jalur Gemilang. Pengawa tu, nanda ka kitai taluk ati serta ngambi berat ka diri empu nyadi anak Malaysia. Tang asai sepi aku ari pemaioh kereta ti mantai ka jalur Gemilang, tebal agi ga orang ti nyadi dereba bala Bumiputera laban sida tu ngasai ka diri nadai menua bukai alai endur ngindik ka kaki. Bala ti ukai Bumiputera, arap ka sida mega ngembuan ati ti taluk ka menua Malaysia, anang semina nganggap ka Malaysia alai ngiga pemakai serta pengeraja aja.

Ba ujung bulan tu, Menua Kapit di sadang umbas ia pengerami laban ti nyadi ka pun alai nyambut Malam Merdeka 31 Ogos 2005 ba peringkat menua Sarawak. Mega di sadang bala pemesai opis perintah serta temuai ari menua luar tentu maioh datai ngulu pengerami nya ila. Ba senentang tu tentu nyendia ka peluang ti manah amat kena ngepun ka rumah panjai nyadi ka palan temuai ngena konsep “Home Stay” laban di jangka ka pemaioh Hotel di Kapit enda tetangkup ka pemaioh temuai maia nya ila.

Bagi kitai sebuat serta bala maioh, anang enda ingat mega, Bulan Lapan tau ka August, bulan tu meh nyadi ka adan bala nembiak ti besekula nyedia ka diri nganti maia ke datai peresa ujung tahun. Ka lebih agi nembiak ke ba Tahun Enam (UPSR), Tingkatan Tiga (PMR), Tingkatan 5 (SPM) serta Tingkatan 6 (STPM). Nembiak ke pintar serta bisi penaluk ba pelajar, udah bebendar meh sida ngemas diri serta udah ngitung hari serta jam, tang ba nembiak ti kurang berat ka pelajar, tentu sida nadai runding datai dia. Nya alai nya meh “peranan” bala ti nemu, nulung ngerak, nulung ngansak bala nembiak, awak ka sida enda jauh tinggal ari orang bukai ti serebak enggau sida.

Ba bulan nyin kemari bisi aku nyebut sekeda bala kitai besaup betulung ngatur pengawa ngemansang ka pelajar ba nembiak kitai. Bisi mega ngatur seminar pelajar, bisi mega ceramah ka sekula. Kati baka taun tu, udah bala kitai begerak kini? Aku arap ka bala kitai sebuat anang sekali-kali rangka penemu serta rangka jam di kena ngangkat ka pelajar ka bansa kitai laban nitih ka pansik siko professor madah ka kitai Iban tinggal ba pelajar lalu ngujung ka bansa Iban mega ti pemadu tinggal ba pemansang bukai baka ekonomi enggau dagang.

Di Semenanjung, rindu mega meda berita ba TV serta Surat Berita. Arap ka berita mutar ka Ekonomi bala Bumiputera Malaysia ulih nyengkaum bala Dayak lebih agi Iban di Sarawak. Rindu meda bala perwakilan UMNO, sida ia amat penuh semengat ngadu ka nasib bansa Melayu. YB Datuk Seri Rafidah Aziz di kecam hebat laban ti nulung bepuluh orang “miskin Melayu” nyadi Jutawan ngena AP serta kontrak-kontrak perintah ke besai.

Nyadi, serebak enggau nya 25 Julai 2005 mega kitai di Sarawak begau laban Helikopter ti mai bala ari opis Pemetaan Malaysia labuh ba “Bukit Tibang (correct name)” pelilih Kapit. Tiga iko ari lima bebadi ba penusah nya. Kitai besampi ka semengat sida ti lesi nya likun belama, tang ngagai sida sebilik ke di tinggal, kitai ngarap ka sida tetap enggau ati ti sabar laban pemarai sida tiga di temu rakyat maioh ngadu ka menua.

Lalu pia mega ngagai bini anak serta apai indai niang Lans Koperal Empeni Ak Karong, arap ka kita ngembuan ati ti tegap ngepun ka pengidup ti baru kelebih agi netap ka bala anak Niang Empeni mujur ba pelajar ka jemah ila.

Ok meh, pulai ka randau dulu, ba runding kitai maioh, ba ni pun pengelemi bala kitai sebuat? Kati pengelemi nya tau nyadi ka pengering kitai enti ia di putar ngena penyampat. Nama pengelemi kitai deh? – ba Education, Unity, Religion, Integrity, Knowledge, Culture, Commitment or Charismatic Leaders?

Aram berunding serta bergerak diatu meh bala kitai sebuat, laban bansa bukai udah nyambut Hari Merdeka enggau ati ti gaga tegal pengering begulai (perpaduan sekaum), maju pa pelajar, maju ba dagang nyau masuk ka 43 tahun kenyau ari 1963 suba.

Bah nama agi di anti kitai? Aram meh betesau bepadah ka bala bukai, lebih agi ka bala di menua pesisir. Nadai hari orang bukai nulung bansa kitai enti kitai empu enda nulung bansa diri.

Salam hormat ari aku, BERSATU TEGUH BERCERAI ROBOH, HORMAT SAMA PEMIMPIN, SA’ATI di tambah ka SEGULAI SEJALAI leka jako kena kitai nuju semengat begulai ngereja pengawa.

Terima kasih.