Jul 2005

PENEMU AKU BULAN JULAI

Sekali agi kitai betemu ba dunya siber. Aku arap ka bala kitai udah mega terenah ngereja pengawa diri empu bekau kitai ti udah lelak nyedia ka pengawa di kena kitai nyambut serta nutup Gawai tu tadi. Taja pan diatu udah ga masuk bulan Julai, tang di jangka sekeda bala kitai semina ulih nutup Gawai bulan tu laban maioh bengkah pengawa serta pengiruh bukai ti nyau beserebak.

Bala kitai ti ngemeran ka pengawa bumai betupi arap ka sida ia udah belabuh nurun ngereja pengawa mega, ukai nama, awak ka sida enda telungga lungga ti tau ngujung ka sida tinggal bulan ngerja pengawa. Ari ke tinggal bulan ngerja pengawa bumai betupi, maioh penusah tau nyadi, gaya hari hujan enggau panas tau amat ngenusah ka maia bumai. Pia mega jelu burung serta semua indu utai babas (serangga perosak) mega tau maioh tau mega kurang sebarang maia nitih ka musim pemakai. Lalu pekara tu nyadi, ulih di seliah sida ke bumai enti sida ia nitih berebak enggau bala maioh.

Lalu ngagai bala ti gawa perintah serta kompeni, sida nadai penanggul laban mina permisi maia ti Gawai serta endang udah terenah pulai ngagai endur gawa, tambah mega sida tentu mega berumban mulai ka diri laban ti ngira bala anak ti besekula. Anak ti besekula nya meh nyadi ka pekara ti pemadu berat enda tau di kira "nadai hal" laban nya meh pemun pengidup rebak baru enti tua deka sereta nitih ka singkang pemansang bansa bukai. Enti bansa orang meda, pekara pelajar nya siti ari pelaburan/investment, kati ba bansa kitai, ulih ka enda semua kitai sekali ka di nengeri tauka di rumah panjai sama ngibun penemu ti sebaka? Endang enda ulih putar dalam tempoh setahun dua, nya alai barang sapa kitai ti dulu tetitih ka bansa bukai enda tau sekali-kali rangka penemu enggau bala ti tinggal di menua pesisir, awak ka sama besaup nambah ka pemaioh bala kitai ngenatai ka diri ba Universiti, serta nambah ka pemaioh tubuh bansa kitai ti nyadi raban profesional. Ba senentang tu, jangka aku, ulih kira ngena jari pemaioh bala kitai sebuat ti deka enggau kiruh. Tang taja pia sekeda raban kitai di Miri, Sibu enggau di Kuching bisi mega udah lama begerak ngatur pengawa kena meransang nembiak bebendar agi belajar. Manah meh nya, pajak ka pengawa ti tau nguntung ka bala maioh, tang asai sepi aku kitai mega anang sekali-kali ninggal ka apai indai, laban pengeran sekeda anak besekula mega bepanggai ba apai indai. Nyadi ngagai bala Cigu Sekula lebih agi ti di menua pesisir, arap ka kita nya meh ti nyadi sempun pun penampak pengidup generasi baru. Nya alai bala kitai maioh amat beterima kasih ngagai bala kita Cigu. Mega arap ka kita Cigu anang jera, anang mega mantul ati nempa pengidup nembiak kitai di menua pesisir nyadi mensia ti menyana lebih agi enti sida ulih masuk kelas ti di kumbai raban Profesional Iban. Jangka aku, kita ke Cigu mega berasai temegah ati nyebut “TU NEMBIAK AJAR AKU SUBA, DIATU MANGKU PENGAWA TU, PENGAWA NYA!!!! Kati setuju bala kita?

Pekara bukai, kati kitai ingat ka sekeda genteran penemu bala bukai, BERSATU TEGUH BERCERAI ROBOH, HORMAT SAMA PEMIMPIN, SAATI serta maioh bengkah leka jako bukai kena ngepun ka semengat begulai ngerja pengawa. Kati ba penemu kitai, ni pengamat kitai, nuan, aku, Tuai-Tuai Rumah, Tuai-Tuai Masyarakat serta Tuai-Tuai Politik ngena genteran jako SEGULAI SEJALAI? Kati ulih kitai ngena genteran SEGULAI SEJALAI ukai semina maia Gawai aja? Ba runding aku, ibun mega leka jako SEGULAI SEJALAI tu nyadi ka lalau pun pengawa kitai besari-sari di bilik penaik, di rumah panjai tau ka di nengeri, kebuah pia awak ka kitai semampai ingat ka tanggung pengawa diri ka diri sebilik, diri serumah, bansa enggau menua.

Bala kitai sebuat, nyadi tu siti berita ti pemadu manah deka bai aku kunsi enggau bala kitai maioh, tang sebedau nya, aku meri puji ka bala sida sekayu rumah ba Rh. Blikaw, Pulau Raya, Batang Rajang, Rh Jeffery Nudung, Nanga Ibau, Rh. Pasang Ng Ensilai, Rh Lulut Sg Tisa Yong Kapit. Sida endang amat patut nerima puji ukai semina ari bala kitai tu tang sida mega nerima puji ari Opis Pengerai serta gerempong dunya ti mai penemu Healthy Setting, The Alliance for Healthy Cities (Palan Bepengerai serta Likun) ti bepalan ba Yokohama Japan. Rumah panjai nya tadi mantai ka runding bala kitai agi ulih Seguali Sejalai ba penemu enggau ba pengawa, nya alai sida ia ulih ngepun ka penemu rumah panjai enda tau alai nginsap. Ba ujung bulan Jun tu tadi aku bisi peluang nemuai ngagai semua rumah panjai nya. Ba nya bala kitai tau ngaga rumah panjai nya nyadi ka contoh rumah panjai ti beresi serta likun. Kelimpah ari nya, sida ia mega meri teladan ti manah ka anak nembiak sida, laban nginsap siti ari penyakit ka tubuh sida ke nginsap serta sida sekayu rumah. Beduduk ari nya barang sapa ti ka nginsap di asuh pansut ari rumah nadai ngira umur enggau pangkat – laban rumah mit alai nginsap bisi di gaga jauh ngejang ari rumah. Undang-undang nagang nginsap mega bisi di pejalai, enti di tangkap nginsap dalam rumah kena tinggang sempekat RM10.00 sekali/siko. Aku arap ke maioh rumah panjai nitih ka penemu sida tu ila. Nyadi ba rumah panjai aku empu, lebih lima tahun nagang diri serumah ngirup arak bisa maia Gawai, enti enda silap kenyau ari 1990 suba, – diatu kira manah mega laban nadai agi meda ayan XO, Martel, Dryjin, … . Ba senentang tu, aku mega meri puji ka bala kami serumah, baik di Miri, Bintulu, Kuching serta dini-dini alai, laban enda ngenusah diri bebeli ka utai ti mar serta tau ngerusak Gawai enggau tubuh diri.

Kelimpah ari nya, pekara bukai ila mega kitai berandau baru, tang sebedau kitai beserara ari menua siber tu, aku meri besai terima kasih serta deka ngenatai ka pengaga ati!!!!!!, meda USAHA kita sebuat ngepun ka ruai randau siber. Selamat mujur dalam semua pengawa serta arap ka Ruai tu enda nyadi RUAI NYIBER.

Terima kasih.