Ulu Machan Primary School, siti ari sekula di ulu sungai, ti di pun kira dalam taun 1964 udah bekau Jantan Ak Besi (diatu Pemancha) seduai TR Banyan Ak Besi betemu enggau tuai opis Kanowit District Council sereta kepala opis sekula di Kanowit dalam taun 1962.
Jantan Ak Besi mega nemuai ngiga penemu ngagai Tuan Tuai (Orang Putih) di Ulu Mujuk/Ulu Kanowit ketegal minta bantu iya ngepun ka sekula di Ulu Machan dalam taun 1963. Tuan Tuai siku ari missionary/Volunteer ari Scotland udah suah lalu teleba amat ngepun ka sekula di menua ulu baka di Ulu Julau, Ulu Kanowit enggau Mujuk kelimpah ari Ulu Kerian di Saratok. Menua Machan semak pasar Kanowit enti di banding ka enggau Ulu Mujuk tauka Ulu Julau, nya alai Tuan Tuai ngemujur ka Jantan Ak Besi minta bantu ari opis Local Council ngepun ka siti sekula di menua tungga ke Ulu Machan.
Bepun ari penemu Tuan Tuai meh, Jantan Ak Besi seduai TR Banyan Ak Besi lalu mai bala tuai-tuai rumah bukai baum sebedau ngelawa opis Local Council. Mayuh mega bala tuai-tuai bisi ngulu aum maya nya kelimpah ari TR Manila (Ulu Machan Tengah), TR. Nuang (Ulu Machan Kanan), TR. Antau (Ng. Jerangku), TR Naga (Ng. Sepituh).
Enggau pemutus randau bala Tuai-Tuai nya tadi, penemu lalu di bai ngagai Opis di Kanowit lalu betemu kali ke dua enggau Tuai Opis Pelajar di Kanowit Charlie Radin(Apai Martin Essau) ari Rantau Kemiding.
Peminta bala Tuai-Tuai ari Ulu Machan lalu di perunding ka Charlie Radin enggau amat dalam, nya alai iya lalu mai Pengajar Adrian Clarke ari Lipus berati ka peluang sekula, tau ka enda di duduk di Ulu Machan, dalam ujung taun 1963.
Nitih ka cherita ari Pemancha Jantan Ak Besi, iya ngulu ka Charlie seduai Adrian Clarke niki ninting rumah panjai ba Ai Machan, laban deka ninga runding sereta bejalai ka pansik alai sekula ti baru deka di duduk. Bala Tuai-Tuai mayuh udah magang mantai ka penemu, tang penemu bedau nyengala putus dini alai sekula di duduk. Ari nya Pemancha Jantan lalu ngenatai ka peminta ngagai Charlie Radin, madah ka siti emperan seberai Rh. Banyan di Nanga Mangut ti besai sereta numbas alai endor nuduk ka sekula.
Penemu Pemancha Jantan lalu di sukung Likung (Apai Jantang), ti sama be empu ka tanah berimbai enggau emperan seberai rumah panjai. Tuai Rumah Banyan mega nyukung, penemu ti deka nuduk ka sekula di Nanga Mangut, laban Nanga Mangut kira tengan batang Machan.
Charlie seduai Adrian Clarke pan lalu berunding ka emperan nya, lalu enti sekula di duduk ka di Nanga Mangut, sekula nya endang iya nguntung ka semua rumah panjai ngulu Machan. Kebuah pia laban Nanga Mangut di tengah batang Machan, kedua, Nanga Mangut numbas iya penyamai di undang orang perintah - Opis Pelajar enggau Opis Pengerai kelimpah ari Opis Local Council ti nyedia ka sekula ba pelilih menua pesisir.
Sebedau sekula Ulu Machan di duduk, mimit aja bala nembiak bisi peluang sekula ba Nanga Machan, kebuah pia laban amat tebal bala apai indai Batang Machan, enda sangup nganjung anak diau jauh kelimpah ari bedau bisi runding ngemerat ka pelajar sekula sebedau taun 1970 kelia.
Udah bekau pejalai Charlie seduai Adrian Clarke mudik Machan, Local Council pan lalu ngemendar ka Ulu Machan Primary School dalam taun 1964. Maya nya rumah sekula lalu di gaga ngena chara gotong royong, Rumah sekula ti terubah ngembuan dua iti bilik class bedinding enggau beatap ka daun biru. Kepala pengajar ti terubah pan Pengajar Adrian Clarke empu, laban iya di karap ka Charlie Radin ulih nuduk ka sekula lalu ngatur ngaga pemansang baka niri ka class enggau rumah alai nembiak, rumah bala pengajar sereta ngumpul nembiak sekula.
Pemancha Jantan Ak Besi
Niang Ex-TR Banyan Ak Besi
Document Tulis Jari Mr. Adrian Clarke (Apai Liam) 20.7.1967
Document Tulis Jari Mr. Adrian Clarke (Apai Liam) 15.6.1966
Document Tulis Jari Mr. Adrian Clarke (Apai Liam) 28.8.1965
Document Tulis Jari Mr. Adrian Clarke (Apai Liam) 24.8.1964
.jpg)
.jpg)
